Министрлер Кабинетинин Төрагасы Адылбек Касымалиевдин Россиянын Алтай Республикасынын Тоолу-Алтай шаарына болгон жумушчу сапары жыйынтыкталды.

Өкмөттүн маалымат кызматы кабарлагандай, сапардын алкагында Касымалиев “Манжерок” (Миң жүрөк) эс алуу курортунда өткөн Эл аралык экологиялык конференцияга катышып, пленардык жыйында сөз сүйлөдү. Иш-чарага Армения, Беларусь, Казакстан, Россия, Өзбекстан жана Тажикстандын өкмөт башчылары да катышты.

Конференцияда дүйнөлүк климаттын өзгөрүшү, экологиялык кооптуулуктар жана аларга биргелешип каршы туруу жолдору талкууланды. Ошондой эле эксперттик жана тематикалык сессиялар өткөрүлүп, катышуучулар экология тармагындагы тажрыйбаларын бөлүшүп, биргелешкен долбоорлорду ишке ашыруунун мүмкүнчүлүктөрүн карашты.