«Рух Санат» дүйнөлүк фестивалы 1-августтан 3-августка чейин Чолпон-Ата шаарындагы «Рух-Ордо» маданий борборунда өтүп, бардык коноктор үчүн кирүү акысыз болот.

Фестивалдын жүрүшүндө дүйнөнүн 30дан ашуун өлкөсүнүн этностук музыкалары жана маданияттары бир сахнада чагылдырылат. Бул уникалдуу фестиваль адамзаттын руханий дүйнөсүн салттуу музыка аркылуу ачып көрсөтүүнү максат кылат.

Программада кыргыз элинин бай маданиятына жана этностук жашоо образына арналган атайын инсталляциялар көрсөтүлөт. Зыяратчылар салбуурун өнөрүн (куш салуу), шырдак жана улуттук оймо-чиймелерди көрүп, кыргыз этностук дүйнөсүнө сүңгүп кире алышат. Фестивалдын ар бир бурчу байыркы кыргыз оймо-чиймелери менен кооздолот.

Ар күнү кечки саат 20:00дөн 22:00гө чейин салттуу музыканы алып жүрүүчүлөрдүн жандуу концерттери өтөт. Алар заманбап лазердик шоулар, LED-экрандар жана күчтүү акустикалык жабдыктар менен коштолуп, көрүүчүлөргө эстен кеткис таасир калтырууну убада кылууда.