5-августта Бишкек шаарынын Көк-Жар конушундагы №172 контурда өзүм билемдик менен курулган 10дон ашык коммерциялык объект жана тосмолор демонтаждалды. Бул тууралуу мэриянын басма сөз кызматынан билдиришти.

Бузулган объектилердин арасында эмерек цехи, картинг аянтчасы, блок чыгарган цех, автосервис, дүкөндөрдүн жана ашканалардын кире бериш бөлүктөрү болгон. Алар 2021-жылдан кийин курулган жана азырынча мыйзамдаштырылбаган айыл чарба багытындагы жер тилкелерине салынган.

Бул аймак мурда Аламүдүн районуна карап, кийин Октябрь районуна өткөрүлүп берилген. Мэрия буга чейин мыйзамсыз курулуштарга жол бербөө үчүн бир нече жолу көчмө жыйындарды өткөргөнүн эскертти.