Суу ресурстары, айыл чарба жана кайра иштетүү өнөр жайы министрлиги Ысык-Ата районундагы Киров айылындагы «Новое озеро» балык чарба көлмөсүндө балыктардын жапырт өлүмүнүн себебин аныктаганын билдирди.

Санитардык-бактериологиялык текшерүүнүн жыйынтыгы көрсөткөндөй, суунун үлгүсүндө нормадан бир нече эсе ашкан көрсөткүчтөр аныкталган. Бул кычкылтек жетишсиздигине, метаболизмдин бузулушуна жана экологиялык тең салмактын бузулушуна алып келиши мүмкүн. Натыйжада балык запастарынын массалык өлүмү жана репродукциянын төмөндөшү байкалган.

Министрлик суунун сапаты санитардык-экологиялык нормаларга жооп бербегенин белгилеп, көйгөйдүн суунун бактериалдык жана химиялык булганышынан келип чыкканын тастыктады. Бул абал балыктарга жана жалпы экосистемага олуттуу коркунуч жаратат.