Министрлер Кабинети Кыргызстандын жарандары үчүн 2025-жылдын үлгүсүндөгү жаңы паспортторду киргизүү тууралуу токтом кабыл алды. Тиешелүү чечимге төрага Адылбек Касымалиев кол койду.

Документке ылайык, өлкөдө эки түрдөгү жаңы үлгүдөгү документ берилет:

• Кыргыз Республикасынын жаранынын идентификациялык картасы (ID-карта);
• Кыргыз Республикасынын жалпы жарандык паспорту.

Мурда берилген 2024-жылкы ID-карталар жана 2023-жылкы жалпы жарандык паспорттор бланктар түгөнгөнчө колдонулат. Андан кийин жаңы үлгүдөгү документтерге өтүү башталат.

Ошондой эле Президенттин Иш башкармалыгына караштуу “Кызмат” мамлекеттик мекемесине жаңы паспортторду жекелештирүү укугу берилди.