2025-жылдын 24-августунда болжол менен таңкы саат 04:00–05:00 чамасында Бишкек шаарындагы «Солист» караоке-клубунда зомбулук фактысы катталды.

Алдын ала маалыматтарга ылайык, жаран Т.У. аталган клубдун күзөтчүлөрү тарабынан катуу сабалган. Жабырлануучунун айтымында, күзөтчүлөр аны башка адамдын эсебин төлөйсүң деген жүйө менен ур-токмокко алып, натыйжада анын буту жана кабыргасы сынган.

Учурда жабырлануучу Бишкек шаарынын №4 шаардык ооруканасына жаткырылып, абалы оор экени жакындары тарабынан билдирилүүдө.

Окуя боюнча жабырлануучу Свердлов райондук ички иштер бөлүмүнө арыз менен кайрылган. Бирок анын айтымында, арыз азырынча тиешелүү тартипте каралбай, укуктук баа берилбей жатат.

Жабырлануучу жана жакындары аталган факты боюнча Свердлов райондук милициясы жазылган арызга укуктук баа бербей, эч кандай чара көрбөй жатканын айтып даттанышууда.