Мамлекеттик кызматкерлер тарабынан административдик ресурсту колдонууга кирген аракеттерди БШКнын мүчөсү Узарбек Жылкыбаев тизмектеди.

Анын айтымында, төмөнкү аракеттер админресурс катары каралышы мүмкүн:

• белгилүү бир талапкерге жай же залды бөлүп берүү;

• талапкерлерге агитация жүргүзүүдө тең эмес шарт түзүү;

• талапкерлердин сүрөт, видеолорун мессенджерлер аркылуу таратуу;

• социалдык тармактарда “лайк” басуу же репост жасоо;

• мамлекеттик органдын өкүлдөрү белгилүү бир талапкер менен гана жолугушуу өткөрүү.

«Эгер чогулуш өтө турган залды бир талапкерге арзан, экинчисине кымбат баада беришсе — бул да админресурска кирет. Мессенджерден видео же сүрөт кетирүү — агитация болуп эсептелет. Ал тургай жетекчи “лайк” басса, башкалар ээрчиши мүмкүн. Ошондуктан мамлекеттик жана муниципалдык кызматкерлерди агитацияга катышпоого чакырабыз», — деди Жылкыбаев “Биринчи радиого” берген маегинде.