Баткен облусунун Сүлүктү шаарында УКМК кызматкерлери мамлекеттин балансына 12 ири объектти кайтарышты. Бул тууралуу Улуттук коопсуздук мамлекеттик комитетинин басма сөз кызматы билдирди.

Тергөөнүн жүрүшүндө «Сүлүктүкомур» АООТуна тиешелүү объекттер жана жер тилкелери аныкталып, алардын айрымдары мурда байланыштуу адамдардын атына сатылып, катталып кеткендиги белгилүү болду. Жүргүзүлгөн ыкчам-тергөө иш-чараларынын жыйынтыгында объекттердин ээлери аларды ыктыярдуу түрдө Сүлүктү шаарынын мэриясынын балансына өткөрүп беришти.

Натыйжада мамлекетке төмөнкү объекттер кайтарылды:
— Сүлүктү шаарынын Д. Жороев көчөсүндөгү 1,02 гектар жер тилкесин камтыган «АБК» административдик имараты;
— Сүлүктү шаарынын Поле-12 көчөсүндө жайгашкан, аянты 1 714 чарчы метр болгон «Кызыл-Булак» электроподстанциясы;
— Сүлүктү шаарынын И. Элмуратов көчөсүндө жайгашкан, аянты 11 067 чарчы метр болгон «АБК» административдик имараты жана жер тилкеси;
— Аянты 24 100 чарчы метр болгон «АБК» административдик имараты жана жер тилкеси;
— Аянты 323,3 чарчы метр болгон ашкана имараты;
— Аянты 3,1 гектар болгон «ВВиСВ» жардыруучу заттар кампасы;
— Аянты 21 144 чарчы метр болгон жер тилкеси;
— Аянты 350,5 чарчы метр болгон ашкана имараты;
— Аянты 1,5 гектар болгон «ЭМЦ» имараты жана жер тилкеси;
— Аянты 3 482 чарчы метр болгон «АБК» административдик имараты жана жер тилкеси;
— Аянты 210,8 чарчы метр болгон бункер;
— «КРУН-6» трансформатору.