Ош шаарынын мэри Жеңишбек Токторбаев Казакстандын президенти тарабынан 2-даражадагы «Достык» ордени менен сыйланды. Бул тууралуу Ош мэриясы маалымдады.

Орденди Казакстандын маданият жана маалымат министри Аида Балаева шаардагы казак эл акыны Абай Кунанбаевдин ысымы ыйгарылган көчөнүн ачылыш аземинде тапшырды. Аида Балаева мэрге элдердин достугун даңазалап жасаган иштери үчүн ыраазычылыгын билдирген.

Аталган көчөгө ошондой эле Абай Кунанбевдин эстелиги жана музейи курулган.

“Абай Кунанбаевдин эстелиги жана жаңыдан курулган сейил бак – бул жөн гана архитектуралык объект эмес. Бул – боордоштуктун эстелиги, көркөм баалуулуктун символу, жаш муун үчүн тарбия аянты”,- деп айтылат маалыматта.

Мындан тышкары Казакстандын президенти Касым-Жомарт Токаевдин «Атам жөнүндө баян» аттуу китебинин бет ачары болуп өттү.