Европа реконструкциялоо жана өнүктүрүү банкы (ЕРӨБ) «Кара-Балта – Чалдыбар» автожолун реконструкциялоо долбоору үчүн 15 млн евро грант бөлөт жана техникалык колдоо көрсөтөт.

Транспорт министрлиги маалымдагандай, ЕРӨБ менен Европа банкы ортосундагы аталган долбоор боюнча макулдашууга Өзбекстандын Ташкент шаарында өткөн Транскаспий транспорт коридору жана өз ара байланыш боюнча инвесторлор форумунда кол коюлду.

Форумга Кыргызстандын транспорт жана коммуникациялар министринин орун басары Бекназар Базаралиев катышкан.

Ал форумда сөз сүйлөп, Кыргызстан үчүн Транскаспий транспорт коридорун өнүктүрүү – эл аралык жана аймактык байланышты бекемдөөгө, экспорттук мүмкүнчүлүктөрдү кеңейтүүгө түздөн-түз байланышкан стратегиялык багыттардын бири болуп саналарын белгилеген.

Ошондой эле форумдун алкагында Бекназар Базаралиев Евробиримдиктин Кыргызстандагы элчиси Реми Дюфло жана Чехиянын транспорт министри Мартин Купка менен эки тараптуу жолугушууларды өткөргөн.

Жолугушуулардын жүрүшүндө тараптар транспорт тармагындагы өз ара кызматташтыкты тереңдетүү, инфраструктуралык долбоорлорду өнүктүрүү, логистика жана транзиттик мүмкүнчүлүктөрдү кеңейтүү маселелерин талкуулашкан.