Кыргызстан айыл чарбасына алдыңкы япон технологияларын тартууну жана инфратүзүмдүк долбоорлорду ишке ашыруу үчүн ири каржы институттарынын колдоосун алууну ниет кылууда. Бул тууралуу КР Президентине караштуу Инвестициялар боюнча улуттук агенттиктин (УИА) директору Равшанбек Сабировдун «Борбор Азия + Япония» бизнес-форумунун алкагында өткөн бир катар жолугушууларынын жыйынтыгында белгилүү болду.

Жолугушуулардын эң мазмундуусу JFR Co. Ltd компаниясынын жетекчилиги менен болду. УИАнын башчысы Равшанбек Сабиров Номибицу Акай менен технологияларды трансферлөө (өткөрүп берүү) келечегин талкуулады.

Тараптар Кыргызстанда адамдар жана жаныбарлар үчүн пробиотиктерди өндүрүшүн ачуу мүмкүнчүлүгүн карап жатышат. Башкы шарт — сапаттын катаал япон стандарттарын так сактоо.

Агенттик белгилегендей, мындай биотехнологияларды республиканын агроөнөр жай комплексине киргизүү айыл чарбасынын натыйжалуулугун жана туруктуулугун кыйла жогорулатууга, ошондой эле калктын саламаттыгын чыңдоого мүмкүндүк берет.

Муну менен катар капитал тартуу боюнча иштер жүргүзүлдү. Улуттук инвестиция агенттигинин башчысы InvesCore Financial Group (ICFG) каржы тобунун жапониялык филиалынын төрагасы Кубо Такааки менен сүйлөшүүлөрдү өткөрдү.

Көңүл борборунда төмөнкү тармактарга инвестиция салуу маселеси турду:

• Инфратүзүмдү өнүктүрүү;
• Өнөр жай;
• Каржы сектору;
• Энергетика жана логистика.

Агенттиктин жетекчиси өнөктөштөргө Кыргызстандын жаңыланган инвестициялык климатын тааныштырып, тоскоолдуктарды азайтуу жана инвесторлордун укуктарын коргоо боюнча реформалар тууралуу айтып берди. Жооп иретинде InvesCore жетекчилиги салым кошуу үчүн конкреттүү долбоорлорду карап чыгууга даяр экенин билдирди.

Мындан тышкары, Токиодо кыргыз бизнес-делегациясы менен стратегиялык сессия өттү. Равшанбек Сабиров ата мекендик ишкерлерди өнөктөш издөө жана биргелешкен ишканаларды түзүү үчүн форумдун аянтчасын жигердүү колдонууга чакырды.

«Мындай форумдарга жигердүү катышуу Кыргызстандын ишенимдүү жана туруктуу өнөктөш катары имиджин бекемдейт», — деп баса белгиледи ал. Ошондой эле технологияларды импорттоо гана эмес, кыргыз товарларын япон рыногуна чыгаруу да артыкчылыктуу багыт экенин кошумчалады.