Жаратылыш ресурстары министрлигинин Ысык-Көл регионалдык башкармалыгынын Экологиялык жана техникалык көзөмөл кызматынын инспекторлору көлдө кыштаган ак кууларды жем менен камсыздоо боюнча пландуу иш-чара өткөрүштү.

Бул акция канаттуулардын табигый тоют базасы азайган мезгилде суучул канаттуулардын популяциясын колдоого багытталган. Мекеменин адистери абанын температурасы төмөндөгөн шартта канаттуулардын аман калышын камсыз кылуу үчүн, жээк тилкесинде алар массалык түрдө чогулган жерлерде жем берүүнү уюштурушту.

Министрлик үзгүлтүксүз кошумча жем берүү биологиялык ар түрдүүлүктү сактоонун жана аймактын экологиялык тең салмактуулугун кармап туруунун зарыл куралы экенин баса белгилейт. Ысык-Көлдө кыштаган канаттуулардын абалына мониторинг жүргүзүү инспекторлор тарабынан туруктуу негизде аткарылууда, ал эми жапайы жаратылышты коргоо иштери кышкы мезгил аяктаганга чейин улантылат.