Бүгүн, 16-февралда, саат 07:30дар чамасында Бишкек шаарынын Тыналиев көчөсүндө адам өлүмү менен коштолгон жол кырсыгы болду.

Бишкек шаардык ИИББдин маалыматында, 36 жаштагы айдоочу «KIA K5» үлгүсүндөгү унаасы менен түндүк багытты көздөй бара жатып, солго бурулган. Ошол учурда каршы тараптан чыгыш багытта жолду кесип өтүп бара жаткан 22 жаштагы Ф.А.ны сүзүп кеткен. Жөө жүргүнчү алган дене жаракаттарынан улам окуя болгон жерде каза болду.

Бул факт боюнча Кылмыш-жаза кодексинин “Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу” беренеси менен кылмыш иши козголду.

Тиешелүү экспертизалар дайындалып, унаа айып токтотуучу жайга киргизилди. Айдоочу кармалып, убактылуу кармоочу жайга киргизилди.