Бишкек шаарында №135 автобуста уюлдук телефон уурдоого шектелген жаран кармалды. Шектүү мурда бир нече жолу соттолгон жана чөнтөк ууру катары каттоодо турган.

Бишкек шаардык милициясынын маалыматында, 5-февралда саат 17:30 чамасында жаран Ош базарынын аймагынан №135 автобусуна түшкөн. Лавановский көчөсүнө жеткенде арыз ээси өзүнө таандык «iPhone 16 Pro» үлгүсүндөгү телефону жоголгонун байкап, милицияга кайрылган.

Аталган факт боюнча Кылмыш-жаза кодексинин «Уурдоо» беренеси менен кылмыш иши козголгон. Ыкчам издөөнүн жыйынтыгында А.А. аттуу жаран кармалган.

Соттун чечими менен шектүү эки айга №1 тергөө абагына киргизилген.

Ошондой эле тергөө иштеринин алкагында уюлдук телефондор сатылган жерлерде тинтүү иши жүргүзүлүп, 60тан ашык телефон табылып алынган. Алардын арасында арыз ээсинин уурдалган телефону да бар экени аныкталган.