Жогорку Кеңештин депутаты Эрулан Кокулов Тоң районундагы айылдык ооруканалардын бирине барган учурда «Эл Аман» мамлекеттик дарыканасынын абалына кескин нааразычылыгын билдирип, ызы-чуу чыгарды. Эл өкүлү дары-дармектерди сактоо шарттарынын талапка жооп бербегендиги үчүн райондун акимине жана медициналык кызматкерлерге кыйкырган.

Текшерүү учурунда Кокулов шприцтер жана капельницалар салынган кутулардын полдо жатканына, ошондой эле муздаткыч жабдууларынын абалына ачууланган. Депутат медицина тармагында атайын билими жок экенин моюнга алганы менен, түшүндүрмө талап кылган.

«Мен медицинада нөлмүн, бирок дарыларды кантип сатып жатасыңар? Эмне үчүн шприцтер менен капельницалардын кутулары полдо жатат? Бул муздаткычта эмнени сактоого болот? Сөзсүз эле үнүмдү көтөрүшүм керекпи?» — деп билдирген парламентарий талаш-тартыш учурунда.

Оорукананын башкы дарыгери жай айында эле медициналык мекеменин көйгөйлөрүн чечүү өтүнүчү менен жергиликтүү бийликке расмий кайрылуу жөнөткөнүн түшүндүрүүгө аракет кылган. Бирок депутат оорукана жетекчисинин жүйөлөрүн аягына чейин уккан эмес.

Бул окуя тартылган видео социалдык тармактарда кызуу талкуу жаратты. Колдонуучулар экиге бөлүндү: айрымдары депутаттын текшерүүдөгү катаал ыкмаларын колдошсо, башкалары анын агрессивдүү жүрүм-турумун жана дарыгерлер, муниципалдык кызматкерлер менен баарлашуудагы этикалык ченемдерди сактабагандыгын сынга алышты.