Кыргызстандын Саламаттык сактоо министрлигине ЮНФПА тарабынан «Мизопростол» 350 миң таңгак дары каражаты берилди. Гуманитардык жардамдын суммасы 18,4 млн сомду түздү.

Министрликтин маалыматында, бул каражат энелердин ден соолугун коргоо тутумун чыңдоо жана аялдар үчүн медициналык жардамдын жеткиликтүүлүгүн жогорулатуу максатында берилген. Мизопростол жашоо үчүн маанилүү дары каражаттарынын тизмесине кирет. Ал акушердик-гинекологиялык жардам көрсөтүүдө оорунун өрчүшүп кетүүсүн алдын алуу үчүн колдонулат.

Дары каражаты өлкө аймагындагы 104 саламаттык сактоо уюмуна бөлүштүрүлөт. Препарат медициналык-социалдык тобокелдик тобуна кирген репродуктивдүү курактагы аялдарга акысыз берилери айтылды.