23-мартта Россия Федерациясынын Элчиси Сергей Вакунов менен Кыргыз Республикасынын Коопсуздук кеңешинин катчысы Адилет Орозбековдун жолугушуусу өттү. Жолугушуунун негизги учуру — кыргыз тарапка «Республикалар – фронтко. 1941-1945» аттуу документалдык жыйнактардын белектик сериясын тапшыруу болду.

Элчи Сергей Вакунов РФ Коопсуздук кеңешинин катчысы Сергей Шойгунун атынан Адилет Орозбековго уникалдуу тарыхый материалдар топтолгон көп томдук басылманы тапшырды. «Республикалар – фронтко» сериясы Улуу Ата Мекендик согуш жылдарындагы бардык союздук республикалардын жашоочуларынын аскердик жана эмгектик эрдиктерин күбөлөндүргөн санариптештирилген архивдик документтерди жана сүрөттөрдү камтыйт.

Буга чейин Сергей Шойгу белгилегендей, мындай басылмалар тарыхый чындыкты сактоо жана аны бурмалоого каршы туруу үчүн өтө маанилүү.

«Ар бир республика жалпы жеңишке өзүнүн баа жеткис салымын кошкон. Биз бул жыйнактарды басып чыгаруу укугун КМШ өлкөлөрүнө өткөрүп берүүнү пландап жатабыз, ошондо жарандар, биринчи кезекте жаштар, өз мекендештеринин эрдиктерин билип, алар менен сыймыктана алышат», — деп билдирген Россиянын Коопсуздук кеңешинин катчысы.

Бул сериянын алгачкы нускаларын өткөн жылдын декабрь айында президент Владимир Путин Шериктештик мамлекеттеринин башчыларына жеке өзү тапшырган.

Жалпы тарых маселелерин талкуулоодон тышкары, жолугушуунун катышуучулары актуалдуу эл аралык күн тартиби боюнча пикир алышты. Россия тарап Кыргызстан менен союздаштык мамилелерди мындан ары чыңдоо багытын ырастады.

Reporter.kg маалымкаты: «Республикалар — фронтко 1941-1945» басылмасы совет элинин нацизмди талкалоодогу чечүүчү ролун тастыктаган фундаменталдуу илимий эмгек болуп саналат.