Жогорку Кеңешке парламенттин жаңы түзүмүнө ылайык комитеттердин милдеттерин кайра бөлүштүрүүнү сунуштаган токтом долбоору киргизилди.

Долбоордо комитеттердин өз сунуштары эске алынып, алардын жоопкерчилик багыттары кайра каралды.

Эмне өзгөрөт:

• Конституциялык мыйзамдар боюнча комитет — айрым маселелер кыскартылып, функциялардын кайталанышын азайтуу сунушталууда.
• Эл аралык иштер боюнча комитет — элчилерди, консулдарды жана туруктуу өкүлдөрдү дайындоого макулдук берүү ыйгарымы алынып салынат, бирок эл аралык келишимдер менен иштөө сакталат.
• Агрардык комитет — экология, жер казынасын пайдалануу жана суу ресурстары боюнча маселелер менен кеңейтилет.
• Илим жана билим берүү боюнча комитет — IT жана дин маселелери боюнча багыттар күчөтүлөт.
• Өнөр жай саясаты боюнча комитет — жетүүгө кыйын аймактардагы логистика жана мамлекеттик турак жай программалары кошулат.
• Финансы жана бюджет боюнча комитет — олуттуу өзгөрүүлөр жок, сунуштар эске алынган.
• Сот-укуктук комитет — судьялардын статусунан тартып бардык сот өндүрүштөрүнө чейин, ошондой эле прокуратура маселелерин камтыган кеңири ыйгарым укуктар бекитилет.
• Социалдык комитет — үй-бүлө, саламаттык сактоо, иш менен камсыз кылуу, гендердик теңчилик жана үй-бүлөлүк зомбулуктан коргоо маселелерине көңүл бурат.