2026-жылдын январь-февраль айларынын жыйынтыгы боюнча Кыргыз Республикасында негизги капиталга салынган инвестициялардын өсүшү катталды. Евразия өнүктүрүү банкынын (ЕӨБ) талдоочуларынын маалыматына ылайык, бул көрсөткүч өткөн жылдын ушул мезгилине салыштырмалуу 8,4%га жогорулады.

Reporter.kg маалымкаты: Негизги капитал — бул мамлекет же компаниялар узак убакыт бою (бир жылдан ашык) иштөө үчүн колдонгон мүлк. Бул айлык акыга же чийки зат сатып алууга жумшалган акча эмес, тескерисинче, «узак мөөнөттүү» салымдар болуп саналат.

Оң динамикага бир нече тармак негизги түрткү берди:

• Иштетүү өнөр жайы: бул жерде салымдардын көлөмү 1,8 эсеге өстү.
• Туризм: туристтик объекттерди куруу жана реконструкциялоо тармагында эң таасирдүү өсүш катталды — бул секторго инвестициялардын агымы бир эле учурда 14 эсеге көбөйдү.

ЕӨБ эксперттери өлкөдө инвестициялык жигердүүлүктүн андан ары кеңейүүсүн болжолдошууда. Бул процессте республиканын экономикасына капиталдын кошумча агымын камсыз кылган мамлекеттик инвестициялар программасынын ишке ашырылышы олуттуу роль ойноору күтүлүүдө.