Жакынкы Чыгышта жарыяланган элдешүү — бул тынчтыкка карай кадам эмес, АКШ менен Израилдин аргасыз тактикалык амалы. Согуштук аракеттердин токтотулушунун себептери жана Перс булуңундагы америкалык аскердик инфратүзүмгө келтирилген эбегейсиз зыян тууралуу эксперттик талкуунун алкагында аскердик эксперт Нурлан Досалиев атайын Reporter.kg басылмасына айтып берди.

Эксперттин пикиринде, кол салган тарап курал-жарактын кескин тартыштыгына дуушар болду. НАТО өлкөлөрүнүн жана АКШнын аскердик-өнөр жай комплекси сарпталган ок-дарылардын, биринчи кезекте — абадан коргонуу тутумдарынын ракеталарынын ордун толуктоого физикалык жактан жетишпей жатат.

«Адатта Саддам Хусейнди бийликтен кулатуудагы АКШ менен НАТОнун Ирактагы согушуна тете бир жылдык аскердик кампанияга жете турган ракетага каршы куралдардын запасы сарпталды. Агрессорлорго ок-дарылардын ордун толтуруу жана өздөрүнүн күжүрмөн катарларын тактоо үчүн жөн гана убакыт керек», — деп түшүндүрдү Досалиев.

Мындан тышкары, эксперт аймактагы америкалык күчтөрдүн өтө оор жоготууларга учураганын билдирди. Анын айтымында, Ирандын ракеталары Пентагондун аскердик инфратүзүмүнө кыйратуучу сокку урган.

«Булуң өлкөлөрүндөгү — Эмираттардагы, Сауд Арабиясындагы, Бахрейндеги, Катардагы дээрлик бардык АКШнын аскердик объекттери талкаланды. Сөз аэродромдор, аскердик-деңиз флотунун базалары, абадан коргонуу бөлүктөрү жана радиолокациялык станциялар жөнүндө болуп жатат. Мунун баары кайра курууга жана оңдоп-түзөөгө муктаж», — деп баса белгиледи ал.

Ошондой эле эксперт авиация катуу жапа чеккенин кошумчалады: алыскы радиолокациялык аныктоочу учактарга (РЭБ) жана күйүүчү май ташуучу учактарга (стратотанкерлерге) чоң зыян келтирилген.

«Жыйынтыгында бул нерсе учурда АКШ да, Израиль да чабуул коюучу күжүрмөн аракеттерди толук кандуу жүргүзө албаган абалга алып келди. Бирок элдешүүдөн кийин дүйнө Иранга каршы агрессиянын кезектеги толкунун күтүшү керек. Тилекке каршы, согуш алдыда», — деп ишенет Нурлан Досалиев.

Кыргызстандын гуманитардык жардамы тууралуу

Кыргызстан жана Борбордук Азиянын башка өлкөлөрү тарабынан Иранга гуманитардык кербендерди жөнөтүү маселесине токтолуп, аскердик эксперт мындай демилгени толук колдой турганын билдирди.

Ал иран эли медикаменттерге жана биринчи кезекте керектелүүчү буюмдарга өтө муктаж экенин белгиледи.

«Согуштан жапа чегип жаткан адамдарга биринчи кезекте боордоштук жардам жана колдоо керек. Бул Ирандын боордош элине карата адамгерчиликтин көрүнүшү болот», — деп билдирди ал.

Иранга гуманитардык жардам көрсөтүүгө Батыштын мүмкүн болгон терс реакциясы тууралуу суроого жооп берип жатып, Досалиев муну «анча маанилүү эмес (экинчи пландагы) маселе» деп атады. Эксперттин пикиринде, заманбап геосаясий кырдаал мурдагы дүйнөлүк тартипти биротоло талкалады.

«Жыл башынан берки кырдаал эл аралык укуктун бардык ченемдери бузулганын көрсөттү. Азыр дүйнөдө күчтүүлөрдүн укугу өкүм сүрүүдө. Кимдин армиясы болсо, кимдин күчү болсо, ким өзүн коргой алса — ошол азыр үстөмдүк кылууда. Бул дүйнөдө алсыздар мындан ары кабыл алынбайт. Бул түзүлгөн кырдаалдан чыккан негизги тыянактар», — деп жыйынтыктады Нурлан Досалиев.