Өкмөт башчы Адылбек Касымалиев 7-мартта Ханой шаарында Вьетнамдын бизнес-коомчулугу менен жолугушту. Бул тууралуу министрлер кабинети билдирди.
Жолугушууга ар кандай тармактарда иштеген 70ке жакын ишкер катышкан. Анда Кыргызстан менен Вьетнамдын ортосундагы соода-экономикалык кызматташтыктын келечеги, инвестицияларды тартуу, ошондой эле экономиканын ар кыл тармактарындагы биргелешкен долбоорлор талкууланды.
Касымалиев ишкерлерге Кыргызстанда бизнес жүргүзүү жана инвестициялык ишмердүүлүк үчүн жагымдуу шарттар тууралуу айтып берген. Вьетнамдык ишкерлер Кыргызстан менен активдүү кызматташууга даяр экенин билдиришкен.
Иш-чаранын жыйынтыгында, төмөнкү документтерге кол коюлган:
- Кыргызстандын Энергетика министрлиги менен Вьетнамдын Өнөр жай жана соода министрлигинин ортосундагы өз ара түшүнүшүү жөнүндө меморандум;
- Кыргызстандын Энергетика министрлиги менен Вьетнамдагы Vtech компаниясынын ортосундагы өз ара түшүнүшүү жөнүндө меморандум;
- «Кыргызстандын улуттук электр тармагы» ишканасы менен Вьетнамдын электр энергетика системасынын жана рыногунун улуттук операторунун ортосундагы өз ара түшүнүшүү жөнүндө меморандум.
