Кыргызстандын грек-рим балбаны Акжол Махмудов Россиянын Professional Wrestling League-8 (PWL-8) мелдешине катышууга даярдыгын билдирди. Бул тууралуу уюштуруучулар соцтармактардагы баракчаларында кабарлады.
Аталган мелдешти 21-февралда Алматыда өткөрүү пландалууда.
Азырынча Махмудовдун атаандашы ким болору аныктала элек. Уюштуруучулар күрөш күйөрмандарынын ой-пикирин билүү үчүн Махмудовго ким атаандаш болуусун каалай турганы тууралуу сурамжылоо жүргүзүүдө.
Күйөрмандар Акжол Махмудовго атаандаш катары сунуштаган балбандардын арасында япониялык Нао Кусака, казакстандык Демеу Жадраев, россиялык Сергей Степанов, Адлет Тюлюбаев, армениялык Малхас Амоян, ирандык Мухаммадали Гераеи бар.
Эскерте кетсек, Professional Wrestling League уюму 2022-жылы Россияда Poddubny Wrestling League деген ат менен түзүлгөн. Былтыр атын өзгөрткөн.
Бул уюм түзүлгөндөн бери 7 жолу мелдеш уюштурулуп, алардын бири Бишкекте өткөн.
Бул турнирге кыргызстандык спортчулардан Акжол Махмудов, Жоламан Шаршенбеков, Айсулуу Тыныбекова, Мээрим Жуманазарова, Үзүр Жусупбеков, Эрназар Акматалиев катышкан.
