Алтай мамлекеттик университети «Алтай түрктөрүнүн эрте орто кылымдагы эстеликтери» аттуу каталогун төртүнчү чыгарылышын сунуштады. «Чоң Алтай» илимий-билим берүү борбору билдиргендей, басылмага өткөн жылдын ноябрь айында Алтай Республикасынын Кош-Агач районунда изилденген 11 археологиялык объект тууралуу маалыматтар кирген.

Каталогдун авторлору — эстеликтерди жеке өздөрү изилдеген адистер: Алтайдын археология жана этнография музейинин директору Ярослав Фролов, профессор Сергей Грушин жана доцент Виолетта Сайберт. Бардык маалыматтар түздөн-түз талаа изилдөөлөрүнө негизделген.

Каталогдо археологиялык объекттердин ар кандай түрлөрү берилген: дөбө-коргондор, тосмолор, стелалар, балбалдар, таш тизмектери, айкелдер, петроглифтер жана руна жазуулары.

Изилдөө учурунда окумуштуулар эстеликтердин абалын комплекстүү түрдө каттоого алышкан. Бул иштер панорамалык сүрөткө тартууну, 3D-моделдерди түзүү үчүн тартууну, объекттердин сыпаттамаларын түзүүнү жана маалыматтарды системалаштырууну камтыган.

Учурда Тоолуу Алтайдын аймагында V кылымдын экинчи жарымынан X кылымга чейинки мезгилге таандык эрте орто кылымдагы түрктөрдүн 105 археологиялык комплекси белгилүү. Алардын ичинен 57 эстелик тууралуу маалымат каталогдун төрт чыгарылышында жарыяланды. Басылмаларга азырынча кирбей калган калган объекттер өзүнчө тизме менен берилди.

Тоолуу Алтайдагы түрк эстеликтерин картага түшүрүү жана каталогдоо иштери мындан ары да улантылат.