17–18-сентябрь күндөрү Бишкекте Түркиянын вице-президенти Жевдет Йылмаздын расмий сапары жана Азербайжан, Казакстан, Өзбекстан жана Түркия мамлекеттеринин өкмөт башчылары катышкан түрк мамлекеттеринин биринчи жыйыны өтөт.

Жол кыймылынын коопсуздугун камсыздоо башкы башкармалыгынын маалыматына ылайык, ушул иш-чараларга байланыштуу борбор калаада айрым көчөлөрдө жол кыймылына маал-маалы менен чектөөлөр киргизилет.

Чектөө киргизиле турган аймактар:

• «Манас» эл аралык аэропортунан Бишкек шаарынын кире беришине чейинки жол;
• Фучик көчөсү (шаардын четинен Чүй проспектисине чейин);
• Чүй проспектиси (Фучик көчөсүнөн Манас проспектисине чейин, чыгыш багытта);
• Манас жана Ч.Айтматов проспектилери («Ала-Арча» мамлекеттик резиденциясына чейинки түштүк бөлүгү);
• «Ала-Арча» мамлекеттик резиденциясынан «Ата-Бейит» мемориалдык комплексине чейинки жол тилкеси.

Тийиштүү көчөлөр толугу менен жабылбайт. Чектөөлөр делегациялардын кортежи өтүп жаткан учурда гана убактылуу киргизилет. Эгер зарыл болсо, башка жолдорго да кошумча чектөөлөр коюлушу мүмкүн.