Баткен районунун Эки-Таш айылындагы кыргыз-тажик чек арасында кайрадан жаңжал чыгып, ок атылды. Бул тууралуу Мамлекеттик чек ара кызматы кабарлады.
Маалыматка ылайык, окуя 2-июнь түнү саат 1:20 чамасында болгон.
«Тажикстан тараптан белгисиз адамдар аңчылык курал менен Ош — Исфана автожолу менен кетип бараткан Кыргызстандын жаранына бир нече жолу ок чыгарган. Октон 38 жаштагы айдоочу жеңил жаракат алып, Самаркандек айылындагы ооруканага жаткырылган”, – деп айтылат билдирүүдө.
Окуядан кийин эки тараптын укук коргоо органдарынын өкүлдөрү жолугуп, сүйлөшүү жүргүзүшкөн. Учурда абал туруктуу.
Белгилей кетсек, 31-май күнү Баткен облусунун Кадамжай районундагы кыргыз-өзбек чек арасында жаңжал чыккан.
