Бишкектин “Ак-Ордо” конушунда велосипед тээп, жөө өтмөктөн өтүп бара жаткан 8 жаштагы кызды унаа сүзүп кетти. Бишкек шаардык милициясы 41 жаштагы айдоочу кармалганын билдирди.

Маалыматка ылайык, 28-июнда болжол менен саат 20:20 чамасында «КамАЗдын» айдоочусу көчө кесилишинде бурулуп жаткан учурда, жөө өтмөктө велосипед тээп бара жаткан кызды коюп кеткен.

Анын кесепетинен 2017-жылы туулган Ч.А. аттуу секелек кыз окуя болгон жерде каза болгон.

Бул факт боюнча кылмыш иши козголгон. Ыкчам тергөөнүн жүрүшүндө 41 жаштагы айдоочу кармалып, убактылуу кармоо жайга камакка алынган.

Учурда бардык зарыл болгон экспертизалар дайындалып, тергөө иштери жүрүүдө.