Баткенге учактар учпай жатат. Бул тууралуу маалыматты Reporter.kg’ге жергиликтүү тургундар билдиришти.
Алардын айтымында, өткөн жумада пландалган каттамдар болбой, аэропорттон жүргүнчүлөргө себебин түшүндүрүшкөн эмес.
«Кары-картаңдарга, ооругандарга кыйын болду. Бир учак бар экен, ал дагы бузулуп калыптыр. Көпкө чейин учпайт деп жатышат», — дейт жергиликтүү тургундар.
«Манас» аэропорту так жооп бере алган жок.
«Каттам учпай калганы боюнча бизде расмий билдирүү жок, болор-болбосун дагы айта албайм. Авиакомпаниянын өзүнө кайрылыңыздар», — дейт аэропорт.
Ички каттамдарды аткарган Tez Jet компаниясынын сайтында бул боюнча эч кандай кабар жок жана көрсөтүлгөн телефон номурларына чалып, байланышууга дагы мүмкүн болбоду.
Bilet.kg компаниясында Раззаков менен Баткен шаарына 9-10-июлга пландалган каттамдар токтотулганын айтышты.
«Бир ай бою каттам болбойт, себеби бизге белгисиз», — деди алар.
1-июль күнү Раззаковго учкан учак жолдо бузулуп, кайра Бишкекке кайтып келген.
Белгилей кетсек, аталган багыттар боюнча билет баасы 4, 5 миңден 6,5 миң сомго чейин сатылып жаткан.
