28-ноябрда Берлинде кыргыз-герман бизнес-форуму жана V Ишкер Кеңештин жыйыны болуп өттү. Иш-чараларды Кыргыз Республикасынын Президентине караштуу Улуттук инвестиция агенттиги, Германиянын экономикасынын Чыгыш комитети жана Германиянын соода-өнөр жай палатасы уюштурду.

Жыйындын ачылышында Кыргыз Республикасынын Министрлер Кабинетинин Төрагасы Адылбек Касымалиев жана Гамбургдагы Кыргыз Республикасынын сыйлык консулу Карл Элердинг экономикалык, билим берүү жана технологиялык байланышты бекемдөө маанилүү экенин, ошондой эле ишкер чөйрөнүн биргелешкен долбоорлорду кеңейтүүгө кызыкдар экенин белгилешти.

Улуттук инвестиция агенттигинин директору Равшанбек Сабиров Кыргызстанда стратегиялык инвестициялар үчүн азыркы учурда жагымдуу шарттар түзүлгөнүн айтты. «Өлкө ишенимдүү жана келечектүү өнөктөш катары өз позициясын бекемдөөгө жетишти. Биз ГЧП (Государственно-частное партнерство) багытында 68-орундан 22-орунга көтөрүлдүк жана 434 млрд сомдон ашык суммадагы 90 долбоордун портфелин түздүк», — деди Сабиров. Ал жаңы ГЧП жана инвестиция мыйзамдары Борбордук Азиядагы инвесторлор үчүн заманбап укуктук системалардын бири түзүлгөнүн кошумчалады. Жакын арада «Венчурдук финансирование жөнүндө» мыйзам каралып, инновацияларды өнүктүрүү үчүн жаңы мүмкүнчүлүктөр ачылат.

Форумга мамлекеттик органдардан, каржы институттарынан жана эки өлкөнүн бизнес чөйрөсүнөн 300дөн ашык катышуучу чогулду. Панелдик талкууларда тараптар герман моделиндеги дуалдык билим берүү системасын киргизүү, легалдуу эмгек миграциясы, энергетика, «жашыл» технологиялар, IT, айыл чарба жана медицина тармактарында кызматташтык маселелерин талкуулашты.

Форумдун жыйынтыгында тараптар мындан аркы кызматташтыкты жана биргелешкен долбоорлорду ишке ашыруу максатында документтер пакети кол коюшту.