14-16-сентябрь күндөрү Бишкек шаарында архитектура тармагындагы эң беделдүү эл аралык “Ага Хан” сыйлыгын тапшыруу аземи өтөт. Бул тууралуу Курулуш министрлиги билдирди.

Маалыматка ылайык, иш-чара Кыргызстан менен “Ага Хан” өнүктүрүү уюмунун кызматташтыгынын 25 жылдыгына арналат. Ага дүйнөнүн ар кайсы аймактарынан келген 150дөн ашык расмий өкүлдөр, архитекторлор жана окумуштуулар катышат.

“Ага Хан” сыйлыгына жалпы 369 долбоор сунушталган. Алардын ичинен 16 өлкөдөн 19 финалист тандалып алынган. Сыйлыктын байге фонду – 1 млн доллар.

Сыйлык тапшыруу аземине чейин Бишкекте көргөзмөлөр, лекциялар өтүп, иш-чара 16-сентябрда эл аралык семинар менен аяктайт. 

Белгилей кетсек, аталган сыйлыкты тапшыруу аземи Кыргызстанда биринчи жолу өтөт.