Бишкекте 1-апрелден баштап соода борборлорундагы балдар ойноочу аянтчалар жабык болот. Бул тууралуу вице-мэр Айжан Чыныбаева брифинг учурунда билдирди.
Анын айтымында, бул шашылыш чара.
«Балдардын ден-соолугу бизди аябай тынчсыздандырат, андыктан балдар ойноочу аянтчаларды эки жумага жаап жатабыз. Бул шашылыш чара. Эпидемиологиялык кырдаал курчуп кетпейт деп үмүттөнөбүз. Андан кийин балдар аянтчаларынын иштешине уруксат беребиз», — деди ал.
Айжан Чыныбаева соода борборлорунда үч күндөн бери рейддер жүрүп жаткандыгын кошумчалады.
«Биз бардык ишкерлерди санитардык стандарттарды жана менин кесиптештерим түшүндүргөн бардык эрежелерди сактоого чакырабыз. Бул биздин жалпы милдетибиз. Ошондой эле транспортто рейддер жүрүп жатат. Шаардык транспорт тутуму ашыкча жүктөлгөнүн билесиз ”, — деди вице-мэр Чыныбаева.
Мектептерде билим берүү башталгандан бери коронавируска чалдыккан 13 бала жана 14 мугалим аныкталгандыгын кошумчалайбыз.
