Борбор калаада жер жана суу мыйзамдарын бузуу менен жайгашкан объекттерди бузуу боюнча пландуу иш-чаралар уланууда. Кезектеги бузулган имарат түздөн-түз Аламүдүн дарыясынын нугунда жайгашкан «Кекеев» кафеси болду. Бул тууралуу борбор калаанын мэриясынын басма сөз кызматы билдирди.

Бишкек мэриясынын маалыматы боюнча, бузуунун натыйжасында жалпы аянты 2 380 чарчы метр муниципалдык аймак бошотулду. Буга чейин Жер пайдаланууну көзөмөлдөө боюнча башкармалык жайдын ээлерине кат түрүндө доо-талап жөнөткөн. Андан соң менчик ээлери курулушту өз ыктыяры менен буза башташкан. Муниципалитеттин комиссиясы да бул тилкенин ижара келишимин жокко чыгаруу жөнүндө расмий чечим кабыл алган.