Атомдук энергия боюнча эл аралык агенттик аткылоодон жапа чеккен «Запорожье» атомдук электр станциясына миссияны жөнөтүүнү координациялоодо. МАГАТЭнин башчысы Рафаэль Мариано Гросси визит жакынкы күндөрү болорун четке какпаарын билдирди.
Тараптар бири-бирин өзөктүк объектке сокку урду деп айыпташууда. Киев ошондой эле станциянын аймагында, атап айтканда, машина залында россиялык аскер техникасын жайгаштыруу боюнча маалыматтарды жарыялоодо. Москва муну кескин түрдө четке кагууда.
АЭСтин айланасындагы кырдаал БУУнун Коопсуздук кеңешинин чукул жыйынынын темасына айланды.
«Объект кандайдыр бир аскердик операциянын бөлүгү катары колдонулбашы керек. Райондун коопсуздугун камсыз кылуу үчүн коопсуз демилитаризация периметри боюнча макулдашууга жетишүү керек. Тилекке каршы, көп сандаган кайрылууларга жана чакырууларга карабастан, деэскалациянын ордуна, биз дагы эле станцияга байланыштуу тынчсыздандырган окуялар тууралуу дээрлик күн сайын билдирүүлөрдү көрүп жатабыз«-деди Бириккен Улуттардын Уюмунун башкы катчылыгынын тынчтыкты куруу боюнча орун басары Розмари Ди Карло.
Киев менен Москва МАГАТЭнин миссиясын «Запорожье» АЭСине жөнөтүү жөнүндө принципиалдуу макулдашты. Орусия июнда текшерүүнү кабыл алууга даяр болгонун ырастоодо. Украина БУУнун Коопсуздук кеңешинин жыйынында атомдук электр станциясы Киевдин көзөмөлүнө кайтарылганга чейин агенттиктин өкүлдөрүн туруктуу негизде станцияга жайгаштырууну сунуштады.
