Чолпон Шаикова Шанхай кызматташтык уюмунун «Маданий интеграция борбору» мамлекеттик мекемесинин директору болуп дайындалды. Бул тууралуу Маданият, маалымат жана жаштар саясаты министрлиги билдирди.

Шаикова буга чейин Ысык-Көл облустук мамлекеттик телерадиоберүү компаниясынын, ошондой эле Чүй телерадиоберүү компаниясынын СТВ телеканалынын директору болуп иштеген.

Ал Кыргыз улуттук университетинин тарых факультетин бүтүргөн. 2014–2018-жылдары Бүткүл дүйнөлүк көчмөндөр оюндарын өткөрүүгө медиа координатор катары катышкан. Ошондой эле Бүткүл дүйнөлүк этноспорт конфедерациясында жана World Ethnogames коомдук фондунда пиар-менеджер болуп эмгектенген.

Мындан тышкары, Чолпон-Ата шаардык кеңешинин депутаты, жаштар бирикмелеринин төрайымы, Кызыл Чырым жана Жарым Ай уюмунун Ысык-Көл райондук комитетинде бөлүм башчысы болгон.