Кыргызстандын футбол курамасы бүгүн, 10-сентябрда дүйнө чемпионатына тандоо оюндарынын үчүнчү баскычында экинчи беттешин өткөрөт.
Кыргызстандын атаандашы Өзбекстан болуп, беттеш Бишкектеги Дөлөн Өмүрзаков атындагы стадиондо өтөт. Оюн саат 20:00до башталат.
Дүйнө чемпионатына тандоо оюндарынын үчүнчү баскычында Кыргызстан Түндүк Корея, Бириккен Араб Эмираттары, Өзбекстан, Катар, Иран менен А тайпасына жайгашкан.
Биринчи оюнунда Кыргызстан Иран менен ойноп, 0:1 эсебинде жеңилген. Азырынча «ак шумкарлар» упай ала элек.
Үчүнчү баскычтын жыйынтыгы менен тайпасында 1-2-орунду ээлеген командалар 2026-жылы өтө турган дүйнө чемпионатына жолдомо алат. 3-4-орунду ээлегендер тандоо оюндарынын төртүнчү баскычына өтөт. Соңку эки орундагы курама жарыштан четтейт.
