Бишкек шаарында жеке мобилдүүлүк каражаттарын, анын ичинде электросамокаттарды пайдаланууга байланыштуу жаңы тартип иштелип чыкты.

Мэриянын маалыматына ылайык, бул өзгөрүүлөр Кыргыз Республикасынын “Жол кыймылы жөнүндө” мыйзамын ишке ашыруунун алкагында кабыл алынууда.

Бишкек шаарынын мэриясы Кыргыз Республикасынын министрлер Кабинети тарабынан 2025-жылдын 7-апрелинде кабыл алынган №183 токтомдун негизинде “Жеке мобилдүүлүк каражаттарын эксплуатациялоо менен байланышкан юридикалык жана жеке жактардын ишин жөнгө салуу тартиби жөнүндө” жобонун долбоорун иштеп чыккан.

Башкы талаптар жана өзгөрүүлөр:

Ылдамдык чеги: Электросамокаттар 25 км/сааттан ашык ылдамдык менен жүрбөшү керек. Бул үчүн атайын чектөөчү түзмөк каралышы милдеттүү.

Кароосуз калтырылган каражаттар: Эгер жеке мобилдүүлүк каражаты жалпы пайдалануудагы аймакта 3 сааттан ашык калтырылса, шаардык аткаруучу органдар аны атайын сактоочу жайга алып кетүүгө укуктуу.

Жайгаштыруу эрежелери:

Электросамокаттарды коюуга ылайыктуу так зоналар аныкталат. Бул чара шаардын ар кайсы жерлеринде туш келди токтотууларды болтурбоого багытталган.

Жөө адамдарга шарт түзүү: Жеке мобилдүүлүк каражаттарын жолдорго жана тротуарларга коюуга чектөөлөр киргизилип, жөө жүргүнчүлөрдүн кыймылына тоскоолдук жаратпоо үчүн кошумча чаралар көрүлөт.

Мындан сырткары, Бишкек шаарынын мэриясы “Бишкек шаарында жеке мобилдүүлүк каражаттарын жайгаштыруу жана пайдалануу тартибин бекитүү жөнүндө” шаардык кеңештин токтомунун долбоорун иштеп чыгып, коомдук талкууга алып чыкты.

Жаңы тартип аркылуу жергиликтүү өз алдынча башкаруу органдары жеке мобилдүүлүк каражаттарын пайдаланууну, сактоону, жайгаштырууну жана кошумча чектөөлөрдү киргизүүнү жөнгө салууга укуктуу болот.

Маданият маселеси — башкы фактор

Адистер белгилегендей, бардык эрежелерге карабастан, негизги ролду колдонуучулардын жеке жоопкерчилиги ойнойт. Электросамокатты кайда коюу керектиги боюнча акыркы чечимди ар бир жаран өзү кабыл алат. Жоопкерчиликтүү мамиле менен гана шаардык чөйрөнү ыңгайлуу жана коопсуз кылууга мүмкүнчүлүк түзүлөт.