2026-жылдын 1-майынан тарта Кыргызстанда электр энергиясына болгон тариф кВт/саатына 27 тыйынга көтөрүлөт. Ресурстун баасын 2030-жылга чейин акырындык менен өздүк наркына жеткирүү пландары тууралуу парламенттик комитеттин жыйынында энергетика министри Таалайбек Ибраев билдирди.

Мекеме башчысы депутаттардын кароосуна тарифтик саясатты өзгөртүү боюнча узак мөөнөттүү божомолду сунуштады. Бул пландарга ылайык, кВт/сааттын баасы жыл сайын жогорулап турат. 2026-жылдын май айындагы көтөрүлүүдөн кийин 2027-жылы 33 тыйынга, 2028-жылы 39 тыйынга, 2029-жылы 47 тыйынга жана 2030-жылы 57 тыйынга кымбаттайт.

«2030-жылы тариф өздүк наркына жетет», — деп белгиледи Таалайбек Ибраев. Ал бааларды экономикалык жактан негизделген деңгээлге чейин акырындап жеткирүү зарылчылыгын түшүндүрдү.

Министрдин сөзү ошондой эле энергетика секторундагы учурдагы абалга да тиешелүү болду. Ал өлкөнүн энергия тутуму үчүн негизги болгон Токтогул суу сактагычындагы суунун көлөмү бул жылытуу мезгилинде 9,4 млрд кубометрге жеткенин, бул өткөн жылдагы деңгээлдин 94%ын түзөрүн билдирди. Жылытуу мезгили аяктаганда, 1-апрелге карата суу сактагычта 6,8 млрд кубометр сууну сактап калуу пландалууда.

Докладда эсепке алуу жана жоготуулар маселесине да өзгөчө көңүл бурулду. Таалайбек Ибраев тармактардагы электр энергиясынын жоготуулары азайгандыгын белгиледи, эгерде 2022-жылы бул көрсөткүч 12,1%ды түзсө, 2025-жылдын жыйынтыгы боюнча ал 10,6%га чейин төмөндөгөн. Учурда республикада 1,6 млн абонент бар, алардын ичинен 923,1 миң керектөөчү заманбап эсептегичтер (АСКУЭ) менен камсыздалган.

Ошентип, 2030-жылга карата калк үчүн электр энергиясынын баасы аны өндүрүү жана жеткирүү чыгымдарын толук жаба турган деңгээлге чыгышы керек. Бул бийликтин эл аралык каржы институттары менен болгон сүйлөшүүлөрүндөгү көптөн берки негизги багыттарынын бири болуп саналат.