2026-жылдын январь айында Кыргызстандын тышкы жана өз ара соодасынын жалпы көлөмү өткөн жылдын ушул мезгилине салыштырмалуу өсүштү көрсөттү. Көрсөткүчтөрдүн жогорулашынын негизги драйвери болуп импорттук түшүүлөрдүн 6,1%га өсүшү саналды. Ошол эле учурда товар жүгүртүүнүн түзүмүндө ташып келүүгө (импортко) карай кескин басымдуулук байкалат: импорттун үлүшү 88%ды түзсө, ал эми экспорт болгону 12%ды түздү.

Евразия экономикалык биримдигине (ЕАЭБ) кирген мамлекеттер менен өз ара соода жүгүртүү январда 396,8 млн АКШ долларына жетти. Бул 2025-жылдын биринчи айына караганда 11,3%га көп.

Биримдиктин ичинде товар жүгүртүүнүн жалпы өскөнүнө карабастан, багыттар боюнча динамика ар түрдүүчө болду:

• ЕАЭБ өлкөлөрүнөн импорт 17,8%га өстү;
• Кыргызстандык продукциянын экспорту 15,7%га төмөндөдү.

Интеграциялык бирикменин ичинде республиканын негизги соода өнөктөштөрү катары салттуу түрдө Россия (өз ара сооданын 68,6%ы туура келет) жана Казакстан (29%) калууда.

Жалпысынан ЕАЭБ мамлекеттерине Кыргызстандын жалпы тышкы соода жүгүртүүсүнүн 37,7%ы туура келет (анын ичинде жалпы экспорттун 45,4%ы жана импорттун 36,6%ы).

ЕАЭБге кирбеген мамлекеттер менен сооданын көлөмү январь айында 656,1 млн АКШ доллары деңгээлинде калыптанды. Евразиялык багыттан айырмаланып, бул жерде өткөн жылдын январына салыштырмалуу 2,9%га бир аз төмөндөө катталган.

Ошого карабастан, үчүнчү өлкөлөр Кыргызстандын тышкы соодасында басымдуу бөлүктү ээлөөнү улантууда. Аларга республиканын бардык товар жүгүртүүсүнүн 62,3%ы туура келет. Бул мамлекеттердин ата мекендик экспорттогу үлүшү 54,6%ды, ал эми импорттогу үлүшү 63,4%ды түзөт.