Ички иштер министрлиги журналист Алтынай Арстанбекова массалык башаламандыктарга чакырууга айыпталып кармалганын билдирди.

Мекеменин маалыматында, «Facebook» соцтармагында жүргүзүлгөн мониторинг учурунда «Даниэль Жоошбаев» аттуу аккаунт бийликти каралоого жана коомдук-саясий абалды курчутууга багытталган материалдар жарыялангандыгы аныкталган. Ыкчам-издөөнүн натыйжасында аталган аккаунттун колдонуучусу А.А. аттуу журналист экендиги такталган.

Бул факт боюнча Кылмыш-жаза кодексинин “Массалык башаламандыктарга чакыруу” беренеси менен кылмыш иши козголгон.

10-мартта журналисттин жашаган жеринде тинтүү иши жүргүзүлгөн. Ошондой эле жарыяланган билдирүүлөр боюнча тиешелүү экспертизалар дайындалган. 11-мартта журналист Бишкек ШИИБдин убактылуу кармоочу жайына киргизилген. Учурда тергөө иштери улантылууда.