Президент Сооронбай Жээнбеков бүгүн, 9-июлда өлкөдөгү эпидемиологиялык кырдаалга байланыштуу кыргызстандыктарга кайрылуу жасады. Бул тууралуу Президенттик аппараттын маалымат кызматы билдирди.
Президент азыр элдин саламаттыгы үчүн аёосуз күрөш болууда экенин айтты.
«Бул күрөштүн ийгилиги — элдин биримдигинен көз каранды. Ынтымак, тилектештик менен ар бирибиз жарандык жоопкерчиликти бийик сезсек, бул илдетти жеңебиз. Бүгүнкү күндүн баатырлары — дарыгерлерибиз өз өмүрүн тобокелге салып, көзгө көрүнбөгөн душман менен жанын аябай, кармашып жатат. Алардын ак эмгегине таазим этип, терең ыраазылык билдирем», — деди өлкө башчы.
Мамлекет башчысы өз кайрылуусунда ар бир жарандын саламаттыгы — мамлекеттик мааниге ээ экендигин айтып, азыркы кырдаалдагы көйгөйлөрдүн чечилиши жеке өзүнүн жана Коопсуздук кеңештин көзөмөлүндө экендигин билдирди.
«Эл арасында азыр суроо көп. Алардын бири — чет элден, эл аралык финансы уюмдарынан келген жардамды бийликтегилер жеп койду» деген сөз. Бул боюнча Өкмөт элге ачык маалымат берүүдө», — деди президент.
Сооронбай Жээнбеков жоопкечилик ар бирибизде экенин жана азыр күнөөлүүлөрдү издөөгө убакыт жок экенин белгиледи.
«Ар бир жаран — өз үй-бүлөсү, балдары үчүн жоопкер. Менин жоопкерчилигим — элимдин алдында. Сиздердин колдооңор менен бул кыйынчылыктарды жеңебиз», — деп билдирди кайрылуусунда мамлекет башчы.
Мындан тышкары илдеттен улам көз жумгандардын жакындарына көнүл айтты.
