1-июлдан тарта Бишкек шаарындагы бала бакчаларда балдардын тамактануусун ата-энелер төлөй баштайт. Бул тууралуу шаардык билим берүү башкармалыгы маалымдады.

Маалыматка ылайык, “Билим берүү жөнүндө” мыйзамдын жана Министрлер кабинетинин “Кыргыз Республикасынын мектепке чейинки билим берүү уюмдары боюнча айрым маселелер жөнүндө” токтомунун негизинде бала бакчаларда балдарды тамактандыруу тартиби бекитилген.

Ага ылайык, Бишкек шаардык кеңеши бир балага бир күндүк тамактанууга 120 сом өлчөмүндө туруктуу төлөмдү белгилеген.

Ошондой эле борбор калаадагы бала бакчалардын жетекчилерине ата-энелер менен түшүндүрүү иштерин жүргүзүү тапшырмасы берилген.

Белгилей кетсек, Бишкек шаарында жалпы 118 муниципалдык бала бакча иштейт.