Казакстан Республикасынын мусулмандарынын дин башкармалыгы (КМДБ) дипфейктерди колдонууну шарият ченемдери боюнча тыюу салынган деп тааныган фатва чыгарды. Документте баса белгиленгендей, Ислам дини коомдун, адилеттүүлүктүн жана адамзаттын жыргалчылыгына кызмат кылган илимий-техникалык прогрессти четке какпайт. Бирок, дин аалымдарынын баамында, дипфейк технологиялары көбүнчө зыян келтирүү максатында колдонулат.

КМДБ муну төмөнкүдөй түшүндүрдү: шарият жалганды жана алдамчылыкты жайылтууга, анын ичинде технологияларды колдонуу менен адамга жасабаган ишти же айтпаган сөздү таңуулоого тыюу салат. Дипфейктер адамдын кадыр-баркына олуттуу доо кетирүүгө, чыр-чатактарды тутантууга, коркуу сезимин жаратууга, ал тургай өмүргө коркунуч туудурууга жөндөмдүү. Андыктан, тамаша иретиндеги жасалмаларга да жол берилбейт. Мусулмандарга дипфейктерди жасоодон жана жайылтуудан алыс болуу сунушталат.