Ички иштер министрлигинин маалыматына караганда, Москвада 21 жаштагы Б.Ж. аттуу кыргыз жараны кармалды.

Тергөөнүн материалдарына ылайык, 2023-жылы Ош шаарында 33 жаштагы А.М. аттуу жарандын сөөгү табылган. Шектүү катары Б.Ж. аны өлтүрүүгө шектелип, Кылмыш-жаза кодексинин 122-беренеси (адам өлтүрүү) менен кылмыш иши козголгон жана эл аралык издөө жарыяланган.

Маалыматка караганда, кармалган жаран Ош шаарынын Касымбекова көчөсүндө маркумду унаага отургузуп кеткен. Алар Кара-Суу районунун Шарк айылына жеткенде чыр-чатак чыгып, шектүү таксистке бир нече жолу бычак сайган. Таксист өзүн куткаруу максатында жакынкы тургундун үйүнө качып барганда, кире беришинде каза болгон.

Шектүү маркумдун “Хонда-Фит” үлгүсүндөгү автоунаасын Салиева көчөсүндөгү үйлөрдүн биринин жанына таштап, окуя болгон жерден изин жашырып, чет өлкөгө чыгып кеткен.

Учурда Б.Ж. Россиянын Жаза аткаруу федералдык кызматынын убактылуу кармоочу жайына киргизилди.