Бишкек шаарында унаа уурдоого шектелген жаран кармалганын Биринчи май райондук милициясынын басма сөз кызматы билдирди.
Маалыматка караганда, 19-декабрда милицияга эркек киши кайрылган. Анын айтымында, түнкү саат 11лер чамасында Тоголок Молдо көчөсүндө токтоп турган “Тойота Камри” үлгүсүндөгү унаасын белгисиз адамдар уурдап кетишкен.
Бул фактынын негизинде Кылмыш-жаза кодексинин 211-беренеси (Автотранспорт каражатын уурдоо) боюнча кылмыш иши козголгон.
Биринчи май РИИБдин ыкчам кызматкерлери тарабынан кылмышка шектүү катары 2005-жылы туулган К.Д. аттуу жаран кармалган. Ал убактылуу кармоочу жайга киргизилген. Учурда тергөө иштери уланууда.
