Кыргызстанда март айынын башындагы байкаларлык өсүштөн кийин тоок жумурткасынын баасы турукташканы катталды. Бул тууралуу Reporter.kg басылмасына Антимонополдук жөнгө салуу кызматынын талдоо, отчеттуулук жана ЕЭК менен өз ара аракеттенүү башкармалыгынын жетектөөчү адиси Жылдыз Асылбекова билдирди.

Мекеменин маалыматына ылайык, марттын биринчи жарымында жүргүзүлгөн мониторинг продукциянын кескин кымбаттаганын аныктаган: республика боюнча орточо эсеп менен он даана жумуртканын баасы 10 сомго, ал эми айрым аймактарда өсүш 20 сомго чейин жеткен.

Кырдаалды тактоо үчүн мекеменин адистери Канаттуулар чарбасы ассоциациясынын, ири соода түйүндөрүнүн жана Айыл чарба министрлигинин өкүлдөрү менен бир катар жолугушууларды өткөрүштү. Талкуунун жүрүшүндө өндүрүүчүлөр рынокко таасир эткен бир нече факторлорду атап өтүштү:

• канаттуулар үчүн тоюттун кымбатташы;
• пландуу эмдөө иштеринен улам өндүрүш көлөмүнүн убактылуу төмөндөшү;
• рынокто импорттук продукциянын жетишсиздиги.

Жүргүзүлгөн иштердин жана өндүрүүчүлөр тарабынан баа саясатынын кайра каралышынын натыйжасында жумуртканын баасы төмөндөй баштады. Акыркы мониторингдин жыйынтыгы боюнча, республика боюнча он даана жумуртканын орточо баасы 129 сом болуп белгиленди.

Борбор калаанын эң ири базарларынын бири — Ош базарында продукциянын баасы категориясына жараша учурда 10 даанасына 80 сомдон 130 сомго чейинки аралыкта болууда.