Энергетика министри Таалайбек Ибраев Чүй электр тармактар ишканасынын Чүй райондук электр тармагына (Чүй РЭТ) барып, 2025–2026-жылдардагы күз-кыш мезгилине карата даярдык иштеринин жүрүшүн текшерди.

Министрликтин маалымат кызматы кабарлагандай, Ибраев иш сапарынын алкагында оңдоп-түзөө жана реконструкциялоо иштеринин абалы, ошондой эле Чүй району боюнча акылдуу эсептегичтерди орнотуу процессин көрүп чыкты.

Таалайбек Ибраев жетекчиликке акылдуу эсептегичтерди орнотууну белгиленген мөөнөттө аяктоо тапшырмасын берип, Чүй РЭТиндеги оңдоп-түзөө жана реконструкциялоо иштерин 1-ноябрга чейин бүткөрүүнү талап кылды. Ошондой эле «КУЭТ» ААКнын башкы директору Ильгиз Сыдыгалиевге электр куроочуларды жайкы жана кышкы атайын кийимдер менен өзүнчө камсыздоо маселесин карап чыгуу тапшырмасы берилди.