2026-жылдын 1-июнунан тартып Кытай Эл Республикасына тамак-аш азыктарын жеткирүүчү чет өлкөлүк ишканаларды каттоонун жаңыланган эрежелери күчүнө кирет. Бул тууралуу КР Айыл чарба министрлигине караштуу Химиялаштыруу, өсүмдүктөрдү коргоо жана карантин департаменти билдирди.

Жаңы киргизилген тартип КЭРдин Башкы бажы башкармалыгы тарабынан кабыл алынган (№280 буйрук) жана кытай рыногуна товарларды киргизүүдө тобокелдикке багытталган мамилени (риск-ориентированный подход) колдонууну карайт.

Бизнес үчүн негизги өзгөрүүлөр:

• Милдеттүү каттоо: Тамак-аш азыктарын экспорттоочулардын бардыгы Кытайдын мамлекеттик маалымат тутумунда — CIFERде (China Import Food Enterprise Registration) катталууга тийиш.
• Колдонуу мөөнөтү: Каттоо 5 жылдык мөөнөткө берилет.
• Көзөмөл жана санкциялар: Эгерде ишкана белгиленген коопсуздук талаптарына жооп бербей калса, кытай тарап анын каттоосун убактылуу токтотуп же толугу менен жокко чыгарып салышы мүмкүн.
• Берүү тартиби: Каттоо процедурасы экспорттоочу өлкөнүн компетенттүү органынын (бул учурда — Кыргызстандын тармактык ведомстволорунун) катышуусу менен ишке ашырылат.

Ишкерлер үчүн сунуштамалар

Жаңы тартиптин максаты — Кытайга алынып келинген продукциялардын сапатына жана коопсуздугуна көзөмөлдү күчөтүү болуп саналат. Буга байланыштуу, Кыргызстандын Өсүмдүктөрдүн карантини департаменти ата мекендик өндүрүүчүлөргө жана экспорттоочуларга жаңы шарттарга алдын ала даярдык көрүүнү сунуштайт.

Ведомство бизнеске колдоо көрсөтүүгө, керектүү консультацияларды берүүгө жана товарларды үзгүлтүксүз экспорттоо үчүн Кытайдын бажы кызматы менен өз ара аракеттенүүгө көмөктөшүүгө даяр экенин ырастады.