Жогорку Кеңештин эл аралык иштер, коргоо, коопсуздук жана миграция боюнча комитети векселдер тууралуу мыйзамга өзгөртүү киргизүүнү караган мыйзам долбоорун биринчи окууда жактырды. Документ электрондук векселдерди (e-вексель) киргизүүнү карайт.

Каржы министринин орун басары Умутжан Аманбаев маалымдагандай, демилге каржы инфраструктурасын модернизациялоого жана карыз милдеттенмелеринин жүгүртүү инструменттерин санариптештирүүгө багытталган.

Анын айтымында, электрондук вексель эсептешүүлөр жана ликвиддүүлүктү башкаруу үчүн келечектүү инструмент болуп саналат жана бир катар артыкчылыктарга ээ. Ошол эле учурда кагаз түрүндөгү векселдерден баш тартуу каралган эмес — алар электрондук формат менен катар колдонулат.