2025-жылдан тарта Кыргызстанда майыптуулук жөнүндөгү маалым каттты алуу процедурасы толугу менен электрондук форматка өттү. Бул тууралуу Эмгек, социалдык камсыздоо жана миграция министрлиги билдирди.
Маалыматка ылайык, жыл сайын 55 миңге жакын жаран майыптуулук боюнча маалым катты алат. Эми документ Tunduk порталында жеткиликтүү.
Процесс кантип иштейт:
- Жаран жашаган жери боюнча үй-бүлөлүк медицина борборуна кайрылат.
- Организмдин функцияларынын бузулушун диагноздоодон жана ырастоодон кийин, негиздер болгон учурда, дарыгер МСЭКке электрондук жолдомо түзөт (088 формасы).
- Бардык керектүү документтер (күбөлүктөр, паспорттор, медициналык корутундулар ж.б.) жарандын катышуусуз эле электрондук түрдө жиберилет.
- Күбөлөндүрүү датасы белгиленет, анатомиялык дефекттер болгондо (мисалы, ампутация) ал жеке катышуусуз эле онлайн өтүшү мүмкүн.
«Буга чейин жарандарга алтыга чейин ар кандай маалым каттар тапшырылса, азыр алар бирдиктүү санариптик маалымат катка бириктирилди. Ошондой эле реабилитациялоонун жана абилитациялоонун жеке программалары электрондук форматка өткөрүлүп, Tunduk системасы аркылуу жеткиликтүү»,- деп айтылат маалыматта.
