Бишкек шаарында Манас проспектиси менен Бөкөнбаев көчөсүнүн кесилишинде чакмак жол чийиндерин жаңылоо иштерине байланыштуу жол кыймылы 14-15-августта саат 00:00дөн 06:00гө чейин убактылуу жабылат. Бул тууралуу мэрия маалымат таратты.

Аталган иштер түнкү убакта жүргүзүлүп, МАИ кызматкерлери коштоп жүрөт. Шаардыктардан каттамдарын алдын ала пландап, альтернативдүү жолдорду колдонуу сунушталат.

Белгилей кетсек, жакынкы убакта борбордогу дагы 11 кесилишке чакмак чийиндери түшүрүлөт.

Маалымат үчүн, чакмак чийиндер (1.26) — ромб сымал клеткалардан турган сары торчо, тыгындарды алдын алуу үчүн светофорлор менен жөнгө салынуучу кесилиштерге колдонулат. Тыгында мындай белгилерге кирүү жол эрежесин бузуу болуп эсептелет.