Манас шаарында унаа токтотуучу жайы жок бардык коммерциялык объектилердин ишмердүүлүгү токтотулат. Бул тууралуу муниципалитет билдирди.

Маалыматка караганда, мэр Эрнисбек Ормоковдун буйругуна ылайык, шаардагы негизги көчөлөрдөгү кафе, ресторан, дүкөн, дарыкана, ашкана, чачтарач, супермаркет, тез татым жайлары жана башка калкка кызмат көрсөткөн жайлар унаа токтотуучу жайы жок болсо жабылат.

Мэрдин орун басары Уларбек Исмаилов алдын ала ишкерлер менен жыйын өткөрүп, аларга унаа токтотуучу жайларды уюштурууну талап кылганын белгиледи. Ал мындай чаралар шаарда унаа тыгындарын алдын алуу жана жоюу максатында жүргүзүлүп жатканын кошумчалады.

Ошондой эле, шаарда негизги көчөлөрдү текшерүү иши жакын арада баштала турганы маалымдалды.